وقفت وهى تبكى
وحاولت تقف عشان تمشي وهو ساعدها ووقفها وبعدين سألها بفضول: انتي جيتي للمكان دا ازاي ؟
بصت عليا حواليها بخوف وقالتله: مش عارفه
ابتسم حمزه بهدوء وقالها: طب قوليلي انتي كنتي فين وانا هرجعك تاني
وقفت عليا وهي بتبص حواليها وافتكرت كريم وزوجته وزين وزوجته وانها لازم ماترجعش عندهم تاني واتكلمت من غير ماتشعر وقالت: بس انا مش عايزه ارجع تاني
بصلها حمزه بدهشه وسألها: طب قوليلي مش عايزه ترجعي فين بالظبط لان المكان هنا فعلا بعيد اوي وغريبه جدا ان انتي توصلي لحد هنا
وقفت عليا تبصله وبدأت الدموع تنزل من عنيها وكالعاده بعدت وشها عنه عشان مايشوفش دموعها..لكنه شاف دموعها وافتكر لما شافها في محل المجوهرات وهي بتبكي بنفس الطريقه دي واتكلم بلطف عشان يخرجها من حالة البكاء دي وقالها: انا حمزه..مهندس معماري وبننفذ هنا قريه سياحيه جديده وهتكون كلها بتطل علي البحر
ابتسمت عليا ومسحت دموعها وقالتله: اهلا بحضرتك ومتشكره جدا لأنكم سعدتوني
ابتسم بلطف وقالها: ممكن اسألك اسمك ايه
ردت بهدوء: "عليا"
ابتسم وقالها: اسمك حلو اوي علي فكره
ابتسمت وشكرته وهي بتبص حواليها وشافت كل المهندسين والعمال واقفين بعيد ومركزين معاهم اوي وسألت حمزه وقالتله: هما مالهم بيبصولي كدا ليه
ابتسم حمزه وقالها: اصل غريبه ان بنت تيجي مكان زي دا ولوحدها وبالطريقه دي..قوليلي انتي كنتي فين
اتوترت عليا وقالتله: انا كنت في قريه هنا برضه بس مش عارفه هي فين
بصلها بعمق وقالها: بس اقرب قريه لينا دي بعيده اوي..معقول انتي جريتي المسافه دي كلها
بصتله عليا وقبل ماترد عليه لقت الكلب جاي عليهم وبيقرب منهم..صرخت وكانت هتجري تاني بس حمزه لحقها ووقفها وهو بيضحك وقالها: استني متخافيش دا "روكي" الكلب بتاعي
بصتله عليا بصدم#مه وقالتله: الكلب بتاعك !!
اتكلم حمزه وهو بيبتسم وقالها: اصل انا متعود اخده معايا في اي مكان بكون فيه لوقت طويل لان مفيش حد يراعيه في البيت وانا مش موجود
