حب من طرف واحد

مين قال طالع راجع
أقصد راجع من المأمورية النهاردة..
_ بجد عرفتي منين دا متصلش!
كملت شغل في عمايل الأكل _ ياسر قالي وجاي معاه النهاردة ع فكرة عايزين نعمل أكل حلو بقى 
كنت بشد ايديها علشان أحركها لكنها كانت واقفة وبصالي _ وأنتي بتتكلمي مع ياسر
_ ها!!
_ ردي ع قد السؤال..
أدركت إني حطيت نفسي في مأزق من غير ما أخد بالي! فاضطريت أكذب ڠصب عني!
_ بقينا صحاب.
_ صحاب
_ أه مش هو صاحب ياسين! 
يعني حد ثقة.. ياسين مبيصاحبش غير الكويسين مش انتي عارفة كدا
_ وأنتي عارفة رأي ياسين في الموضوع دا بقى ع كدا
_ أكيد مش هيعارض ع الاقل لو ياسين مش هنا نطمن عليه من ياسر ولا إيه
_ ياقوت!!
_ إيه دا الأكل كان هيتحرق..
الأكل أنقذني في حوار حطيت نفسي فيه بغبائي بليل وصل ياسين ومعاه ياسر.. كان قلبي بيوجعني كل ما خالتو تحط ايديها على دراعه اللي متصاب فيه وهو يغمض عينه پألم من غير ما يتكلم علشان متاخدش بالها..
_ اتفضل يا ياسر دي علشانك.. 
_ تسلم إيديك.
لاحظت نظرة ياسين بس تجاهلتها .. كنت بحاول مهتمش بيه نهائي زي اني بردو مسلمتش عليه بلهفة زي كل مرة. 
كان بيبصلي بإستغراب حتى خالتو كانت مستغرباني!
لكن مكنتش عايزة اخلف وعدي مع نفسي وإني قررت أخد جنب من ناحيته!!
_ ياقوت فين ياماما 
_ في أوضتها ياحبيبي في حاجة أناديهالك! 
_لأ خليها أنا عايزاها في موضوع كدا هدخلها..
بعدت من ورا الباب في الوقت اللي لقيته بيخبط فيه.. قعدت ع المكتب وعملت نفسي بذاكر وأنا بقول _ ادخل.. 
دخل وساب الباب مفتوح وقعد على الكنبة قصادي _ إيه ياكتكوتة عاملة ايه في المذاكرة 
ممكن بلاش كتكوتة ديه أنا كبرت 
أول مرة يعترف إني كبرت! 
_ بجد 
_ بجد بس هتفضلي طول عمرك بردو كتكوتي!
اتكسفت ومعرفتش أتكلم في الوقت اللي صدمني لما كمل كلامه!!
_ حتى لو جالك 100 عريس.. 
_ إيه ! عريس إيه ! 
_ ياسر طلب إيديكي مني.. أنتي إيه رأيك 
_ ياسر!! 
_ أيوة أنا شايف أن في بينكم كاريزما حلوة. 
_ يعني أنت موافق!! 
_ الرأي ليكي بس