فارسي الصعيدي

فارسي الصعيدي
اسراء ابراهيم 
اسكربت 
 

همي يا هنية ،، زين زمانه علي وصول ،، وشوفي مُهرة خلصت الوكل ولا لا

قالها عبد القادر بجدية وهو واقف بهيبة في بيته والكل بيجري من حواليه وبيحضرو لاستقبال زين ابنه اللي راجع من السفر

هنية بلهفة / مش مصدجة يا عبد الجادر ان ولدي اخيرا راچع بعد غيبة سبع سنين ،، سبع سنين وانا مستنظراه علي نا1ر ،، واللي مهون عليا انه هو مرتاح اهناك وراضي

عبد القادر بابتسامة / واهو چاي يا هنية ،،ومش هيفارجنا تاني واصل

هنية بفرحة / يارب يا حچ ،، هروح انا اشوف مُهرة خلصت الوكل ولا لسة

دخلت هنية المطبخ وشافت مهرة وهي بتقلب الاكل فقربت منها بسرعة

هنية / خلصتي يا مهرة ولا لسة عاد ؟،، زين زمانه علي وصول

مهرة بفرحة / خلاص يا عمتي انا خلصت الوكل وطفيت عليه كمان ،، هروح اني بجي اغير خلجاتي

هنية بابتسامة / ربنا يباركلي فيكي يا بتي ،، روحي انتي يلا

خرجت مُهرة وسابت هنية تكمل وطلعت اوضتها عشان تغير هدومها وبعد ما خلصت وقفت قدام المراية وبصت لنفسها وسرحت في الماضي اللي لحد دلوقتي مش عارفه تتخلص منه ،، افتكرت زين وهو لسة مخلص جامعة وبيقولهم انه عايز يسافر ،، افتكرت لما كانت بتتحايل عليه وبتترجاه بعنيها وبتقوله اللي مقدرش لسانها ينطقه وهو انه ميسافرش ويسيبها ،، كانت بتحبه بطريقة يمكن تكون مرضية ،، وهو مكنش حاسس بيها ولا حتي شايفها غير بنت خاله وبس ،،بصت لنفسها بحزن وافتكرت اخر حاجة قالها ليها زين قبل ما يسافر ،، لما قالها انه مسافر عشان يكون نفسه وانه هيرجع بسرعة عشان روحه هنا،، اتمنت وقتها لو يكون بيتكلم عنها  ،، بس للاسف من يومها وهو مرجعش ولا حتي فكر يكلمها او يسأل عليها ابوه او امه ،، وفهمت وقتها ان خلاص زين اكيد شاف حياته وانها عايشة في وهم مش اكتر ،، مسحت مهرة الدمعة اللي هربت من عنيها وحطت الطرحة علي شعرها ونزلت